Gamayng Tingog, Dako’g Kaisog
Gahapon, nag-chat akong manghud. Pagbasa nako sa iyang message, nagtanga rako, wala ko kalihok dayon. Ana pa siya,
“Te, naa koy isulti…”
Akong pag-umangkon na si Ziqi, naa daw “secret” nga gusto isulti sa iyang daddy. Dili pa siya kahibalo unsaon pag-ingon, mao nga naghulat siya nga moabot iyang mga ig-agaw aron sila ang motabang pagpasabot.
Naluya ko humag basa sa tibuok message dili tungod dili ko aware sa mga ing-ani na scenario, in fact tungod kay nahitabo ni sa bata nga duol kaayo sa akong heart.
Although worried kaayo ko ni Ziqi, wala ko kalikay o kasagang nga makahinumdom sa akong kaugalingong kasinatian. Ni mirror back nasad sa ako, abi nako naka move on nako.
Nakahuna-huna ko…
Mao kaha ni gibati nila mama ug papa sa dihang nahibal-an nila akong mga kaagi?
Si Ziqi…unsa kaha iyang gibati ron?
Malimtan ba niya ni? Kanunay naba siyang mahadlok?
Mausab ba ang iyang pagtan-aw sa iyang kaugalingon?
Kay kabalo ko unsa kabug-at ang epekto ani.
Dili lang ni usa ka panghitabo nga mulabay ra. Usahay, mahimo siyang sinugdanan sa pakigbisog sa self-worth, sa pagsalig sa uban, ug sa pagpangita sa imong bili after sa usa ka hitabo nga wala nimo gipili.
Nanghinaot ko nga lahi iyang sugilanon. Nag-ampo ko nga dili niya kinahanglan agian ang taas nga dalan sa pagpangita ug love outside herself or her family.
Nag-ampo ko nga pinaagi sa gugma sa iyang ginikanan mahimo siyang mas kusgan kaysa sa trauma.
Bilib lang gyud ko ni Ziqi, nitug-an siya.
Bisan gamay pa siya, nisulti siya.
Unsa ka daghang mga bata, babae man o lalake ang wala gayud nakasulti? Pila sa amo ang nagpakahilom sulod sa daghang katuigan?
Pila ang gidala ang kasakit hangtod sa pagkahamtong, ug sa ulahi gitawag nga “kiat,” “igat,” o “bigaon,” nga walay nakakita sa samad nga ilang gidala?
Ang iyang kaisog nagpahinumdom nga ang kahilom dili mao ang katapusan sa istorya.
Tingali, pinaagi sa iyang gamay nga tingog, adunay usa ka bata nga maluwas.
Ug sa tanan nga mga makabasa ani nga nakaagi o nag-agi niini…
Dili ninyo sala. Dili nato sala. Wala o dili mawala ang inyong dignidad.
Wala mawala ang gugma sa Diyos alang kaninyo, kanato.
Ug bisan lisud ug taas ang dalan sa pagkaayo, ang Ginoo makahimo sa pagdala sa kahayag bisan sa pinakangitngit nga mga samad.
Sa mga ginikanan, padayon lang sa pagpaminaw sa inyong mga anak. Ayaw dayon sila hukmi o balewalaa kung naa sila’y isulti nga lisod tuohan. Usahay, ang inyong pagpaminaw ug pagtoo mahimong unang lakang sa ilang pagkaayo.
