Para sa Pari Lang ang Lami?
Sa kadaghang pista nga akong naadtuan sukad sa akong pagserbisyo isip media team sa archdiocese, pipila ka mga higayon ko nakabantay og kultura nga hangtod karon nagapabilin: ang tanang lami para ra gyud sa pari.
Makapahimuot ni sa unang tan-aw. Tinood, mapasalamaton ko nga kami, kasagaran, tapad gyud sa pari o obispo matag mangaon. Makauban sa lamian nga pagkaon, maapil sa gihandom nga pagkaon sa lamesa. Maayo ang buot sa mga tawo, mahigugmaon, ug matinabangon sa ilang mga ministro — kay sila man ang naghalad sa ilang kinabuhi alang sa simbahan, sa katawhan, ug sa Ginoo.
Apan di malikayan nga makapamalandong pud ko. Sakto ba nga tungod kay “para sa pari,” abugon nato ang uban? Ang kagutom ba sa ordinaryong tawo, lahi sa kagutom sa pari?
Ang Pagkaon sa Ebanghelyo: Pan Para sa Tanan
Sa Juan 6:11, gisaysay:
“Gikuha ni Jesus ang mga tinapay, ug human Siya magpasalamat, iyang gipanghatag kini ngadto sa mga tawo nga naglingkod — ug gibuhat usab niya kini sa mga isda, hangtod nga ang tanan nabusog.”
Walay giuna, walay giulahi. Wala mag-ingon si Jesus nga ang labing daghan o labing lami para lang sa iyang mga disipulo. Ang milagro mao ang pagkabahin-bahin sa pan sa tanang nanginahanglan.
Ang Katilingban nga Makasabut
Tinood, dili kini pasabot nga walay lugar ang atong pagtahod sa atong mga kaparian. Dako atong pasalamat sa ilang pagpangalagad. Apan ang atong kultura usahay makadala og pagkabahin-bahin tungod sa atong paghatag ug bili sa exclusivity — diin ang “lamian” nga pagkaon gihimong sukod sa dignidad.
Sa Mateo 25:35, si Jesus miingon:
“Kay ako gigutom, ug inyong gihatagan ako og pagkaon…”
Ug sa bersikulo 40:
“Bisan unsang buhata ninyo sa labing gamay sa akong mga igsoon, inyong gibuhat alang kanako.”
Kung ang tawo atong abugon, tungod lang kay wala siyay sutana, unsaon nato pagsabot sa presensya ni Kristo sa matag ordinaryong bisita?
Sa simbahan, ginasimba nato ang Dios nga nagpakatawo, nagpakamubo, ug mipili nga magkaon uban sa makasasala, kabus, ug mga walay pulos sa sosyedad.
Busa hinaot unta nga:
- Ang atong paghatag sa pari, mahimong inspirasyon, dili limitasyon
- Ang pagkaon nga para sa Ginoo, ibahin nato para sa tanan
- Ang atong mga lamesa magpahinumdum sa walay pinili nga gugma sa Dios
Kay basin unya, sa pagkadugang sa pagkaon sa pari, nabyaan nato ang Kristong gigutom nga naglingkod sa daplin.
